給中史的情書

記得10年前既公開考試，仲有中文口試，當年考生需要進行3分鐘個人短講及15分鐘小組討論。果時條題目真係畢生難忘，題目叫「給香港的情書」，有愛才會有恨，你唔鐘意果樣野，你根本唔會理果樣野，你係因為鐘意，所以先會痛心，但當然你都會有少少希望，唔係就變左死心，回天乏術。還記得當時兩個MARKER望住我既眼神，個MARKER「好似」仲有少少眼濕濕，好似觸動到佢唔知咩咁。當然，最後謎之自信下，我都拎左個ORAL A。

正常人都唔會記得自己十年前既公開考試答咩野，但當年三分鐘好似永遠鎖入左我記憶咁，清除不了

而今日，在下將條題目MODIFY左做「給中史的情書」。

(正文太多技術含量，如果睇唔明/唔想睇可以SKIP睇結尾)

----【上面係廢話，我是一條分隔線】----

正文﹕在下對中史科既熱愛，始於中三。當年遇到在下既恩師，恩師當年可以唔洗拎住本書咁將清代到中華民國課程講到活靈活現，就係果時就同中史結左孽緣。當年會無啦啦得閒無事到圖書館拎會考中史試題黎睇，睇下自己識唔識答。或者無啦啦會聽講歷史既電台節目。還記得中六中七時，恩師教寫中史答題框架，講既係一種組織，係一種邏輯，係一個表達既技巧。例如一題好簡單既題目【2009AL﹕隋代的亂亡，始於文帝，成於煬帝，此說當否？(25分)】(依題題目太老餅，不過因為眼界大開，所以都要一講) 恩師教唔好平舖直敘咁寫，最好以「文帝易儲」作引言，以依件事貫穿文帝時有伏線，煬帝時加速，最後再收結，豈不是好？我就諗，係喎﹗真係好洗好用，自此，我就講得寫歷史係一種藝術黎，係語言的藝術，唔係真係咁死記 (雖然都係死記，但對住D咁既題目，我就好興奮)。果時已經有一種好想教中史既衝動。

中史科，係死板，依個說法係一定程度上正確。但其實自2006年會考改革後，考評局盡量改變中史科死板既印象。由以前20分只佔4分既意見題，改變為佔6分。高考中史科亦唔係純考問XXX事件的因由，而開始滲入思考既成份，到左文憑試，都見到日益進步既考評，例如必答題會考問史料既優劣，為何兩則資料有不同的演繹？選修單元中有問及定都長安是得還是失？等等。縱然有不足之處，但都見到考問團隊既出心出力。可惜，依個進步，以20為轉折點，開始轉變。

原本有5點加多個例子

但太長剪左

【甲乙分途的知識斷層】

依個就真係死症，2021DSE開始，考生在必答題部份可以選讀古代史或近代史，選答題部份亦無視甲乙兩部都要選題的限制，變相同學只需ALL IN甲部/乙部即可應對題目。關於依個問題，之前都討論過，根據2021DSE既統計，必答題中，85%選答安史之亂，15%選答國共分合。選答題中，秦皇62%，魏晉及清初都有50%，列強入侵只得30%，到了中共兩題在20%以下。依個情況變相鼓勵同學不讀近代史，只讀古代史，變相同學對清代以後發展一無所知，因為考試唔出，老師就可以唔教，咁大家就真係要靠自己自學﹗但會自學既人又有幾多？考評局係米認為減少課程內容會有助提高選讀率，但你要知道，覺得死背既人始終會覺得死背，都係會退修。

【客觀評分的死症】

有別於2019年前經常出現既10-15出題模式，2020DSE開始多左好多填充題，2020DSE都係6題都係得2題，2021DSE變到5題，到最新既發展去到6題，當中25分當中有7-10分係填充/MC題。填充題的出現，變相鼓勵同學都讀細字瑣碎位。依家係互聯網既世代，其實好多野上網都有得查，你知道姚崇提出十事依一D中三先會考問既題目/上網可以搵到既野有咩用？相反，讀歷史其實要訓練書寫既能力、要訓練思維等等，考評局可能認為依個方法會吸引人讀中史，其實係一種趕客手段，原因﹕無挑戰性/煩瑣…….

【封鎖貼題的離地】

中史課程浩瀚長篇，貼題本屬情有可原，因為真係冇可能唔貼題，即使考好5**既同學都冇可能唔貼題，但係出卷班人又想多人讀但又封鎖貼題，但溫中左果一題又出得好簡單，背書題，依個就變左賭大細既遊戲，你溫唔中就真係唔好意思，下年再續，溫中左就升大學﹗

如果真係因為題目難而力有不逮，咁樣死都死得心甘命抵，依家只要貼題就搞掂既情況下，真正有才既人，就係咁被浪費了。

【選修單元的零碎】

12 – 15年時，同學需要於2個選修單元中各自選答一題，所以認識既歷史都尚算全面。可惜，16後，考生只需一個選修單元中選答兩題，需要令學生會對該單元中讀多幾題，但顯得非常割裂。

以地域史為例，考生需要修讀黃河的長安，唐代以長安為都，長安因為華夷一家既精神，胡漢文化融和，佛教開始傳入本土，考試就要求同學背佛教道教點繁盛。但係，如果冇宗教史做背景，同學跟住就代入唔到依一段歷史。

.

--【上面係廢話，我是一條分隔線】--

結語﹕古代黎講，平民見到昏君，都會想佢快D死，咁樣就有個新賢君即位，但依個只係賭機會率。在下同樣，21完左，原本以為填充題情況只係係20同21出現，但點知，情況照舊。我其實好心淡，同學應該都明白你愛一樣野，果樣野既回應不似預期，係會好傷痛、好痛心。有人同我講，其實隻眼開隻眼閉就算，其實我都好想咁，但奈何做唔到，有時真係不吐不快﹗大家應該都明白依個感覺。

成日諗，如果我當補習係搵錢工具，搵夠錢，米過快樂人生，你說多好~!

寫依篇文，係想講，我同中史科係有一段情，

我能夠見過你豐盛一刻，已經心滿意足。

「以我沾濕的眼睛 對美好光景致敬」